ម៉ិចស៊ិចកូ៖ ប្រធានាធិបតីម៉ិកស៊ិក Andres Manuel Lopez Obrador បាននិយាយកាលពីថ្ងៃចន្ទម្សិលមិញនេះថា ប្រទេសរបស់លោកគឺជាប្រទេសដែលមានសុខសុវត្ថិភាពជាងសហរដ្ឋអាមេរិក បើទោះបីជាមានការរិះគន់ពីវិបត្តិសន្តិសុខក្នុងប្រទេសម៉ិកស៊ិកបានកើតមានឡើង ជាពិសេសហេតុការណ៍ចាប់ជំរិតទៅលើជនជាតិអាមេរិកចំនួន ៤នាក់កាលពីដើមខែមីនានេះ នៅតំបន់ភាគខាងជើងប្រទេសដែលបណ្ដាលឱ្យជនរងគ្រោះពីរនាក់បានស្លាប់។ 

ក្នុងការឆ្លើយសំណួររបស់អ្នកសារព័ត៌មានជុំវិញសំណួរអំពីបំរាមនៃការធ្វើដំណើរទេសចរណ៍ទៅលើជនជាតិម៉ិកស៊ិកពីសំណាក់់សហរដ្ឋអាមេរិក លោក Lopez Obrador និយាយថា៖ "ម៉ិកស៊ិកមានសុវត្ថិភាពជាងសហរដ្ឋអាមរិក។ នៅទីនេះគ្មានបញ្ហាណាមួយកើតមានជុំវិញការធ្វើដំណើរកម្សាន្តណាមួយឡើយ"។  លោកបានបន្តថា ភ្ញៀវទេសចរអាមេរិក និងប្រជាជនម៉ិកស៊ិក ដែលរស់នៅក្នុងសហរដ្ឋអាមេរិក ត្រូវបានជូនដំណឹងយ៉ាងល្អអំពីសុវត្ថិភាពរបស់ប្រទេសនេះ ដោយលើកឡើងពីការកើនឡើងថ្មីៗនៃជនជាតិអាមេរិកដែលរស់នៅក្នុងប្រទេសម៉ិកស៊ិក។

ប្រធានាធិបតីម៉ិកស៊ិកនិយាយថា ការរិះគន់លើការដោះស្រាយឧក្រិដ្ឋកម្មរបស់យើងគឺជាផ្នែកមួយនៃយុទ្ធនាការ "ប្រឆាំងម៉ិកស៊ិក" ដោយអ្នកនយោបាយអាមេរិកអភិរក្សនិយម ដែលចង់រារាំងការអភិវឌ្ឍន៍របស់ប្រទេស។ យោងតាមទិន្នន័យដែលចេញផ្សាយដោយធនាគារពិភពលោកបានឱ្យដឹងថា អត្រាករណីឃាតកម្មនៅក្នុងប្រទេសម៉ិកស៊ិកមានកម្រិតខ្ពស់ជាងសហរដ្ឋអាមេរិកប្រមាណជា ៤ដងនៅក្នុងឆ្នាំ២០២០។ យ៉ាងណាក្តី ជុំវិញបញ្ហានេះស្ថានទូតអាមេរិកប្រចាំប្រទេសម៉ិកស៊ិកមិនមានមតិណាមួយជុំវិញករណីនៃការលើកឡើងនេះនៅឡើយទេ៕